Amosando publicacións coa etiqueta celebracións. Amosar todas as publicacións
Amosando publicacións coa etiqueta celebracións. Amosar todas as publicacións

venres, 20 de febreiro de 2026

OBRADOIRO DE COLAXE SOBRE ROSALÍA DE CASTRO

Con motivo do Día de Rosalía de Castro realizarei un taller de colaxe no que traballaremos ao redor da figura desta marabillosa poeta galega. Será da man do Concello de Miño, no Centro Social da Rúa, onde espero atoparnos o vindeiro luns 23 de febreiro. 

O taller é de balde e só tes que facer a inscrición previamente para que eu teña todo preparado da maneira máis xeitosa e fagamos os mellores colaxes sobre esta figura tan respetada. No cartel tes a información para anotarte, veña que estás a tempo. 

Vémonos en Miño! 

 

 

 

 


venres, 20 de xuño de 2025

MOSTRA DE PROCESOS DO LABORATORIA 2025

A arte está á nosa disposición para xogar co mundo e para entendelo dende esa experimentación. Como mulleres, a nosa voz escóitase menos e máis baixa dende unha inseguridade esculpida na nosa educación dende a infancia. O Laboratoria propón a arte para darnos voz e investigar os temas que nos interesan dende un espazo seguro onde sentir que medramos. 

O sábado 14 de xuño falamos e compartimos co público asistente os procesos de creación abertos nos últimos meses. Un evento cheo de complicidade co Laboratoria, complicidade co grupo e que nos dá a seguridade de estar creando algo ben fermoso e importante no noso barrio, na nosa cidade e para toda a sociedade. 

 

Volvemos en Outubro con forza e, se queres formar parte de esta experiencia escribe pronto a polotallerdepolo@gmail.com 


Fotografías de ergkillo 




venres, 13 de xuño de 2025

LABORATORIA. MOSTRA DE PROCESOS CREATIVOS.

Este sábado 14 de xuño presentamos os procesos de creación abertos nos últimos meses no grupo Laboratoria. 

Como sabedes este é un grupo de mulleres que aborda de maneira conxunta un camiño de creación no que cada participante elixe unha temática a investigar e desenvolver mediante a linguaxe artística. 

Acompañadas neste camiño por Polo que cada mes fai unha proposta práctica ou teórica que abra novos carreiros para continuar. Refórzase a experiencia con titorías individuais que faciliten o achegamento á práctica artística. 

Este é un espazo que xurde da convicción de que a arte é unha ferramenta de transformación persoal e social aberta a todas as persoas. Como mulleres podemos empregala para o empoderamento e investigación de temáticas que nos preocupen.

Lembra a cita; 

sábado 14 as 19:00 horas na Tobeira de Oza, ao principio da rúa Merced na Coruña. 

Esperámoste!!



martes, 8 de outubro de 2024

EXPOSICIÓN EN A FÁBRICA de OLEIROS

O mércores 16 de Outubro inauguramos expo no Centro Cultural de A Fábrica de Oleiros. Unha celebración do noso gusto por pintar e de tantos anos que levamos xuntos unidos pola arte. 

Levaremos obras as profes; Julia Aguiar, GiselaPolo e tamén teremos traballos das artistas do laboratorio creativo máis pinturas dos artistas do tallerdepolo e como non dos peques do @atelierconjulia. 

Pintamos porque temos que pintar e así seguiremos mentras o corpo nolo pida! Estades convidadxs á inauguración e, se non podedes, ide a vela noutro momento e ademais desfrutade da contorna espectacular na que se atopa a sala.

#pintoqueteñoquepintar




martes, 28 de maio de 2024

MOSAICO DA MEMORIA exposición en Casa Museo M Pita

 

Queridxs artistas!  

Estamos de celebración xa que Polo inaugurou o mércores 22 de maio ás 19:00 horas na Casa Museo M Pita a exposición Mosaico da Memoria na que exhibe dúas pezas que poñen en valor ás mulleres que nos precederon.

O Mosaico da memoria é unha obra participativa na que a partir de encontros, inicialmente non mixtos, rememoramos ás mulleres que foron referentes para nós. Máis de cincuenta persoas colaboraron na realización de esta peza na que cada unha recrea unha parte do mosaico a partir dos seus albumes de fotografías familiares. Ata o de agora realizáronse encontros en varios barrios de A Coruña, Betanzos e Pontedeume e a obra seguirá medrando xa que realizaranse novos encontros ao longo deste ano e o vindeiro.

A mostra permanecerá na Casa de María Pita ata o 30 de xuño e antes de que finalice realizarase un encontro na propia sala de exposición que fará do Mosaico da memoria unha peza viva. 

 

Vémonos alí!!


 

martes, 28 de febreiro de 2023

EXPOSICION na Casa Museo M Pita dos procesos creativos abertos polo Laboratorio Creativo

 Inauguramos o venres 3 de marzo de 2023 , as 18:30 horas unha exposición con traballos e procesos creativos abertos no último ano no laboratorio creativo que levamos adiante no tallerdepolo. Estades convidadxs a pasar o día da inauguración ou ao longo do mes de marzo por ese bonito museo.




Somos un grupo de mulleres que nos reunimos unha vez ao mes nun laboratorio creativo coa guía da artista Dores Polo para compartir un proceso creativo de reflexión acerca de distintos intereses persoais. Algunhas de nós non temos experiencia plástica ou artística e imos experimentando e compartindo un camiño aberto á creatividade co resto do grupo, descubrindo como todas podemos expresar e compartir sentimentos e pensamentos de maneiras que non esperabamos.
Compartir proceso é unha parte fundamental para medrar e ter confianza nas nosas habilidades. Nesta exposición vemos pezas que son froito de meses traballando e experimentando ao redor dun tema de interese. Cada participante aborda unha temática ou un problema a investigar e observar dende novos ángulos.

domingo, 9 de outubro de 2022

I CONCURSO DE DEBUXO DE HALLOWEEN organizado pola Distrito Oza, Asociación de Comerciantes.

 


Cóntovos! 

teño o pracer de colaborar nunha iniciativa da Asociación de Comerciantes Distrito Oza para dinamizar o noso querido barrio. Está a organizar dita asociación o “I Concurso de Dibujo Infantil de Halloween” máis unha festiña familiar para finais de mes coa mostra de todos os debuxos na entrada do Forum .

Ademais de colaborar con eles o aporte do tallerdepolo son DOUS VALES por dous meses de clases cada un para os gañadores do concurso, e máis premios super chulos!!

 


 


Gañadores seremos todxs se imos dando pasos para reconciliar a vida do barrio con unha vida acolledora e digna para todas as persoas que o habitamos. Para empezar a dar pasos, se coñecedes nenxs de 6 a 12 anos anímaos a participar, sabendo que o mellor de debuxar é ese momento en que abrimos as portas á imaxinación e deixamos que as liñas camiñen libres representando realidades e soños de maneiras singulares, únicas ;) Elixiranse entre as persoas participantes tres traballos para ser premiados porque non podemos (aínda) premiar a todas, pero si podemos admirar e desfrutar a imaxinación e beleza dos debuxos nunha mostra dos traballos na entrada do Forum do 26 ao 31 de Outubro. Si que gañamos todxs :)

É un pracer que conten co tallerdepolo dende a Asociación de Comerciantes de Oza e poder aportar á veciñanza de Os Castros un pouquiño da ilusión que pode transmitir o debuxo e a pintura. Todxs temos a certeza do que implica un barrio vivo, cheo de comercios e movemento onde poder atopar o que precisamos e establecer relacións que van máis alá do puro acto de mercar.

Anímovos a participar e oxalá teña o pracer de coñecerte en persoa porque vas desfrutar dese vale de clases por dous meses ;)

domingo, 19 de xuño de 2022

Presentación de obras e procesos creativos no Faro de Oza

 

O domingo 26 e o luns 27 o Faro de Oza se iluminará de arte.


O luns 27 CompartiremosO xuntanza artistas locais falando de experiencias e proxectos levados adiante o pasado 2021. Será unha presentación tranquila para coñecer proxectos desenvoltos o pasado ano, poñer en valor os nosos traballos, coñecernos e facer rede para próximos proxectos ou convocatorias. E un evento aberto a artistas, persoas interesadas na arte e público xeral que queiran coñecer como está o ambiente creado cidade; benvidas as voces todas.

 
Contaremos con:

Verónica Moar, cerámica artística e performance, presentàndonos o seu traballo “Portas do mar”   https://www.veronicamoar.com/

Verónica Nóvoa, arte textil, presentará as Xornadas ATC.  

https://www.instagram.com/veronovoa__/

Paula Pintos, de Cía. Masamadre, que nos falará de Icaro @_icaro___ .

 www. Ciamasamadre.com
@ciamasamadre
@_icaro___

Victor Ares, ceramista, cederanos para a ocasión unha das súas Mulleres floreiro, veremos o vídeo poema “A ciencia do poema” de Estibaliz Espinosa. 

@victorares              https://es-la.facebook.com/varesces

https://estibalizespinosa.com/tag/poemas/

 

Julia Aguiar, artista plástica, nos contará sobre os “Muráis Mariñeiros As Xubias” e falaremos tamén con           https://www.instagram.com/julia.guiar/

      

Eu vos contarei sobre o Transitando arte a experiencia, colaboracións e o resultado e estarei encantada de vervos xunto ao mar.    https://transitandoarte.wixsite.com/transitandoarte


 
O domingo serán a equipa do laboratorio creativo as protagonistas que nos compartirán os seus avances do curso pasado e contaránnos en que momento se atopan, veredes que marabillas están a facer! O domingo ás doce presentación deste equipo lab e

Paula Cabaleiro e Toni García presentarán o poema visual “Corazón florecido” as 13.00 horas
Seguiremos no Faro o resto do día, con cafeteira incluída e praia ao carón, mellor momento para coñecernos imposible ;)


 

 

 




xoves, 9 de xuño de 2022

Visita a exposicións

 Este curso tan só nos deu tempo a facer un par de visitas a exposicións. 

A primeira foi ao Museo de Belas Artes a ver a obra pictórica de Alejandro González Pascual, unha obra moi interesante para as persoas que empezan a pintar. Ofreceunos tematicas diferentes, uns traballos poéticos e virtuosos na técnica que estivemos comentando xuntas. 

A segunda visita foi a exposicion "Textiles de artistas", que recolle estampados textiles deseñados por diferentes artistas moi recoñecidos ao longo do seculo vinte. Esta exposición aínda está na Fundación Barrié de la Maza ata o vindeiro 19 de xuño e é entretida e fácil de ver. 





Por suposto, aproveitamos a saída para coñecernos mellor, falar de arte e outras moitas cousiñas que xurden ao tomarse un café xuntas :)


mércores, 22 de setembro de 2021

Se busca: novo equipo Lab.

O laboratorio consiste nun acompañamento ao teu proceso creativo, un taller ao mes no que compartimos os nosos intereses e os avances do noso traballo plástico. Podes combinalo con titorías persoais nas que traballar aspectos concretos que che preocupen e o ritmo de traballo o marcas ti. 

O grupo de Lab. 2021 foi heteroxeneo, con intereses e bagaxes moi distintos. NOn é necesario un coñecemento previo de plástica para participar, si é preciso ter unha actitude de apertura e exploración e marcarse uns obxectivos cara os que camiñar, nós faremos posible ese camiñar. Os temas dependen das participantes, algúns son máis intimos e densos e outras persoas prefiren qauedar nun área menos profunda e poñer enerxía na parte técnica. 

O pasado curso esta experiencia permitiunos conectas coa nosa vulnerabilidade e, ao tempo, coa sorprendente forza que agochamos dentro de nó. Foi unha montaña rusa de aprendizaxes, exploracion, frustración e sorpresa que non culmina aquí senon que continuará en cada unha das participantes; coa apertura a esta capacidade tan fermosa de transformar a vida, as feridas , o cotiá en algo novo para compartir. As miñas cómplices marabillosas nesta aventura Marta V. M.R. , P. Cristobo, Natal e Shaina foron valentes e  fixeron medrar o mellor de min. :)

Agora un novo Equipo Lab. está por chegar e unha nova experiencia por vir... apúntate!! Escribeme a polotallerdepolo@gmail.com ou ao tlf. 617 293 024 e aí te reservo praza ou resolvo  as tuas dúbidas.


As imaxes son da  presentación de procesos creativos e obras do Laboratorio 2021 en A Tobeira de Oza, compartindo o momento con un montón de persoas amigas que se emocionaron con nós. 

Fotografías e vídeo de Carlota Méndez 

 















domingo, 20 de xuño de 2021

Laboratorio Creativo, presentación de obras e procesos creativos abertos

Como sabedes neste último curso, dende marzo 2020 conformamos un grupo de exploración artística, un laboratorio de creación no que compartir experiencias e camiñar creativo.  Este grupo participou cos seus traballos -en proceso- na exposición Medrando con Arte, que realizamos en Arteixo en decembro e xaneiro 2021. Nuns momentos tan grises foi incrible o esforzo e a ilusión que sacamos adiante, e agora volvemos a enchernos de ilusión para compartir con vós os últimos avances e pasos destas creadoras. 

Compartimos de novo obras e procesos creativos coas persoas asistentes, así que podes emocionarte con nós o próximo venres 25 de Xuño,  en A Tobeira. Se queres asistir escribe a polotallerdepolo@gmail.com para recibirte o mellor posible e organizar axeitadamente o número de asistentes. 



 


Foi este un grupo lab cativo e heteroxéneo, con intereses e bagaxes moi distintos. Non é necesario un coñecemento previo de plástica para participar, si é preciso ter unha actitude de apertura e exploración e marcarse uns obxectivos creativos cara os que camiñar, nós faremos posible ese camiñar. Os temas dependen das participantes, algúns son máis íntimos e densos e outras persoas prefiren quedar nun área menos profunda e poñer a enerxía no traballo plástico, nas posibilidades e melloras técnicas.


Esta experiencia de laboratorio permitiunos contactar coa nosa vulnerabilidade e, ao tempo, coa forza sorprendente que se agocha dentro de nós. Foi unha montaña rusa de aprendizaxe, exploración, frustración e sorpresa que non culmina aquí senón que continuará en cada unha das participantes; coa apertura a esta capacidade tan fermosa de transformar a vida, as feridas, o cotiá en algo novo para compartir.  

 


 


Foi un tempo duro e gris na rúa mentres nós xogábamos e soñábamos con un mundo distinto, dando pasos a medrar como persoas e como creadoras. Construíndo en Os Castros  un niño de arte, de complicidade e sororidade; un niño máxico, seguro e confortable ata na tormenta máis gris. 


Estas mulleres, Marta V., M R , Natal, P. Cristobo, Shaina  e eu -Polo- queremos pechar un ciclo o próximo 25 de Xuño para ser máis conscientes dos novos por vir, do moito que nos queda por crear e facer... 


25 de Xuño en A Tobeira, en Os Castros, no principio da rúa Merced a partir das 18;00 horas, a partir das seis da tarde expoñemos obras e falamos sobre o proceso creativo destes últimos meses. Esperámoste !







martes, 15 de decembro de 2020

MEDRANDO CON ARTE

Mostra de traballos 15 aniversario!

Temos o pracer de convidarte ao aniversario do taller! son 15 anos de tallerdepolo, incrible chegar ata aqui :)  e compartimos con vós traballos dalgunhas das persoas que pasaron polos obradoiros ao longo deste tempo, nunha exposición que empeza o próximo venres 18 de Decembro e que estará un mes na Sala de Exposicions do Centro Cultural de Arteixo. Faltan traballos de moitas de vós, oxalá máis adiante , que tal no 20 aniversario? facer unha expo na que incluir tantisimas e marabillosas persoas que tedes pasado polo taller ou por actividades realizadas no barrio, na cidade... ... son moitas experiencias e encontros nestes pasados quince anos.

Medrando con arte! Alí vos esperamos!, desexando atoparvos nun contexto tan bonito e cheo de boas enerxías , ofrecémosvos unha visita guíada polas obras expostas contando un pouquiño de nós. Podes contactarnos e reservar un día e hora para a visita ou pasar polo Centro cultural e logo nos contas a túa visión da expo.  #medrarconarte



En tempos de pandemia as artes aportan non só entretemento senón que promoven a forza interior para enfrontar o medo e a soidade, entender o momento que estás a vivir, así como descubrir horizontes cara ós que camiñar. É tamén unha maneira saudable de explorar emocións e vivencias dotando de maior complexidade a nosa percepción do mundo e de nós mesmas. Compartir afección ou paixón con outras persoas abre a oportunidade de novos encontros e vivencias compartidas, xorden momentos únicos de diversión e complicidade. Máis vivas que nunca! :)))))


Espero verte na expo!!!

sábado, 23 de maio de 2020

veranearte adultas, pílula de expresión e encontro

A incerteza conéctanos a todas estes días, recuperar as actividades cotiás será cousa de tempo e tamén de enerxía pois todxs quedamos afectadas dalgunha maneira; emocionalmente, por suposto. Pero todas temos tamén experiencia en cambios e en emocións fortes, e sabemos que pasar á acción e tomar o control é sanador. Xa levo varios anos propoñendo veranearte adultas, mulleres compartindo tempo e vivencia mentres deixamos que aflore a nosa creatividade. Un espazo de encontro, un espazo seguro, compartindo aprendizaxes que nos leven a soñarnos diferentes.

Obxectivo pintar e xogar compartindo tempo e vivencia; dar estimulo á nosa creatividade e liberdade, coñecer un pouco mais da Historia da Arte “mutante”, perdida e encontrada porque se vai construíndo a pasos, segundo se incorporan miradas que non se tiñan en conta.

O pracer de aprender e traballar xuntas, de gozar coa cor, coa musica, coas outras ... unidas nunha ofrenda a nós, pensándonos-soñándonos da mellor maneira, na nosa mellor versión.

Apúntate para ir deseñando os pequenos grupos ao longo do verán!




"Las artes no solo pueden representar lo que se ve o se oye; tambien pueden representar lo que se siente" , E.W. Eisner

luns, 28 de outubro de 2019

Dinamizando o Samain en By Carmina, Os Castros



Tivemos un día estupendo de sol para ser Outubro así que, desfrutamos da terraza da cafetería ByCarmina, e enchémola de vida e nenxs con ganas de pintar e explorar a súa creatividade. 
Deseñando e pintando as cabazas  para logo, quen quixera, facerlle unha diadema de follas secas, herbas e outros elementos que tinha polo taller para reaproveitar conseguindo unhas fermosas e divertidas diademas que acabaron nas cabezas en vez de nas cabazas. 
Fermosa xornada! 
Agradecer a bycarmina ese espazo tan fermoso e aberto ao barrio e as familias, nenas e nenos que se achegaron con tantas ganas a participar e dar vida a rúa.



Repetiremos obradoiros este Nadal, que xa está chamando á porta :) 
Estade atentxs as redes sociais ou neste blog teredes toda a info  



 

domingo, 6 de outubro de 2019

Nas Encrobas


Un orgullo comezar o outono presentando o fanzine “aS eNCRoBaS” con poesía, música, memorias e lembranzas do pasado, arenga de loita por un futuro de aire-auga-terra limpas, na compaña de moitas persoas sensibles e loitadoras na III Marcha pola Memoria en As Encrobas. Unha xornada Emotiva sen dúbida; coa enerxía da choiva que nos leva á Galicia mais profunda, a que moitas levamos na memoria rural. Gran esforzo e traballo realizado pola organización da Marcha neste evento que combina cultura, arte, diversión, reivindicación e loita. Todo isto feito con moitas ganas e gran honestidade xerando un dia cheo de vida e enerxía dende a unión da historia pasada coa loita polo futuro sostible. Agradecer á organización o convite , agradecer a Laura Rey Pasandin que me amadriña con moita tenrura e a todas as persoas asistentes tan boa vontade, humor e tanta arte.





 
https://www.sermosgaliza.gal/articulo/social/iii-marcha-pola-memoria-das-encrobas-xunta-mais-200-persoas/20191002115019084630.html

https://www.facebook.com/events/1139196256272604/
 
  "Participamos 16 persoas na elaboración do fanzine e contando coa poesía de Laura RP, traballando de maneira non intensiva (combinada con outros exercicios e experiencias) ao longo de cinco meses aprox.
Partimos de material documental como:
--- A ceo aberto, o documental de Xosé Bocixa que visionamos en tandas de 10 minutos por dia.
----As imaxes do fotoxornalista Xose Castro
----O blog de Maria das Encrobas
----Asunción de ti, libro familiar de Xosé Luis Linares Barbeito e Mercedes López Otero
-----Poesías de Emma Pereira (As comadres´Nghrobas) e de Laura RP
---- E tamén vimos o vídeo promovido pola Industria mineira para divulgar nos colexios públicos galegos.

O proceso creativo vai partir da información que imos recibindo e absorbendo de a poucos, do diálogo e reflexión sobre o que nos vai chegando, das emocións coas que conectemos e identifiquemos para podelas compartir durante o proceso e, tamén poder usalas para crear.
Coas persoas maiores análise do documental e análise do resto de material para identificar con que aspectos temos maior empatía ou puntos de interese. Para elixir así o tema da nosa ilustración e pasar ao concreto.

Para min foi un traballo complexo, moi intenso e cheo de ilusión. Ás veces, duro fronte á incerteza do proceso creativo e as diferencias xeracionais que constatan o descoñecemento e distancia da mocidade participante co rural galego, coa lingua e coa historia próxima. Pero a potencia desta ferramenta (as artes) para traballar temas complexos fíxose evidente e clara.
A creación deste fanzine ten varios puntos de acción:
----o traballo de concienciación e análise coas persoas participantes dende unha actividade creativa.
----ese vinculo entre a aprendizaxe de técnicas gráfico-plásticas e pensamento ofrecendo un lecer/ unha actividade enmarcada na educación non formal de calidade- enriquecedora.
---- a xeración de contidos gráficos para usar nas loitas contra o extractivismo e outras loitas.
-----a xeración dunha obra que se move de man en man e conta a través de imaxes e dende idades e persoas distintas a loita das Encrobas: facendo posible unha conexión (a través da arte plástica e poesía) con calquera persoa do mundo. E con outras loitas planetarias similares.
-----un proceso creativo exportable e recomendable para educadorxs, activistas e grupos de persoas inquietas.

Hai moito traballo por facer se queremos outro mundo posible, empezando por sonhar que queremos realmente. De eses sonhos sairán os caminhos e pasinhos para ir amodo. Mirando cara adiante a longo prazo nunha loita sen fin e sen fronteiras, que continuar’a con esta mocidade e a sua descendencia... o futuro somos nós e o que imos facendo día a día."
                                                                                                                          Fotografia de Yoshimura Eye

sábado, 31 de agosto de 2019

Ponlle Arte ao barrio!


O barrio é onde transcorre a vida cotiá e debería ser un lugar seguro e estimulante para todas as persoas que o habitan... o barrio somos nós e nós facemos o barrio. Sonsoles Mosteiro (Ocupacións significativas) e tallerdepolo deseñamos e levamos á practica un obradoiro piloto pensado para fortalecer o tecido de barrio: ofrecendo un rol diferente á mocidade (de 10 a 19 anos) , poñéndoa en relación co comercio local e empregando as Artes Plásticas como linguaxe de creación e comunicación. Nesta nova experiencia destacar o entusiasmo das mozas e mozos implicados, dos negocios do barrio colaboradores que conectaron inmediatamente coa idea e a nosa visión, coas posibilidades que ofrecen dinámicas de este tipo. 




De maneira resumida contarvos que o obradoiro consiste en poñer en contacto comerciantes locais (con algunha necesidade estética ou de deseño), con un equipo de adolescentes dispostos a realizar un proceso creativo na busca de solucións e propostas para esas necesidades. Embarcándonos todas/todos nunha aventura onde o tempo foi un factor determinante no ritmo e “saboreo” da experiencia: animamos ás participantes a facer horas “extras” totalmente voluntarias e, para a nosa sorpresa, todas se presentaron ilusionadas a avanzar no traballo que tiñamos por diante. O cal nos mostrou que situalos nese rol de "profesionais-persoas que solucionan e crean ideas" é enriquecedor, estimulante e divertido. Outra dimensión do proxecto foi ofrecer formación e diversión no tempo de verán, no mes de agosto, enriquecer ese “tempo morto” con traballo interesante, estimulante que nos pon en relación coa vida profesional. 

 https://es-es.facebook.com/somososcastros/
 http://www.tiendamab.com/
 https://www.facebook.com/Bichocleta/






 

Foi un proxecto complexo, onde estar atentas ao trato, vínculos do grupo, comunicacións cos colaboradores, ritmo e tempos de execución, busca de materiais, información, probas de materiais e técnicas, ... realmente intensa cada xornada e, levar adiante os procesos creativos en marcha, de maneira positiva, cos aportes de todxs, sen certezas nos resultados, ... resultou unha excelente experiencia de aprendizaxe para as responsables do proceso. Todo un reto. Compartido coa colaboración dos comerciantes do barrio: Tienda Mab juegos y libros, Cafeteria By Carmina e a tenda-taller de bicis Bichocleta






Visita de Carlota Ramudo Mendez, que nos mostrou a súa presentación de traballo final para a Escola de Artes P. Picasso na modalidade de Fotografía, vimos formas de presentación e como levar adiante un proxecto creativo a través da mirada dunha moza nova. 
https://es-es.facebook.com/carlota.mendez.353


 
Compártovos aquí algunhas imaxes do día a día do proxecto e, ao final imaxes da presentación de todo este traballo , o traballo da mocidade participante e a proposta de Ocupacións significativas e tallerdepolo nesta aventura. 

 Historieta para a Bichocleta  



  carta para By Carmina 



                                                      
                                                                          Etiquetas para a Bichocleta



                                           Mural pintado no interior da Bichocleta




 Fotografías da celebración final a cargo de Carlota Ramudo Mendez: